Zorro

Am morge hockt’r meischtens uf em badwannerand
I sim gschtreifte pijama mit em zahnbürschtli ir hand
& ghört wie geng wie ir wohnig obedrann dr wecker geit
& när geit’r I d’chuchi & chochet sech schnäu nones chacheli kafi
& vorusse isch es häu & d’sunne schiint & es fröit ne
Dass ändlech dr summer chunnt
När geit’r meischtens uf ds tram & när fragt’r sech immer öb'r ds gas
Jitz het abträäit oder ds liecht het la brönne
& am helvetiaplatz schtigt’r us & chouft sech dr blick un es päckli marylong
& när louft’r z’düruuf bim gianni sim lädeli vrbii & bir metzg & bim merkur
& dert schufle sie echli uf ere bouschteu unger de tramschiene dräck umenang
& de hockt’r im büro uf sim platz & vis-à-vi hockt en angere maa
Mit ere glatze wo scho glii pensioniert wird — sie si duzis
& schaffe beidi scho länger dert
& när sortiert’r irgendöppis & redt nid viu & am mittag isst’r
Meischtens im burgereziel im gärtli under de chegeleböim
Es menu allei am ne tisch
& när mues’r wieder los & när hockt’r wieder da & irgendwenn am namitag
Lütet meischtens sini mueter a & fragt ne wie’s ihm geit
& verzeut & verzeut & är sortiert irgendöppis drzue
& öppis nach de füfe schteit’r wieder im tram
& nach de nüüne schteit’r meischtens im ne pärkli umenang mit sim rägemantu
& mit sim däge I dr hand
Am morge hockt’r meischtens uf em badwannerand
I sim gschtreifte pijama mit em zahnbürschtli ir hand
& d’sunne schiint & es fröit ne dass ändlech dr summer chunnt