Къарачайым, Малкъарым

Деу аланла зорчуладан, джауладан
Кёб ёмюрлени Аллах бла сакъланнган,
Сейир джуртну эркелете, ийнакълай,
Биз джашайбыз - Малкъар бла Къарачай! «Бу дунияны джандети» деб аталгъан
Тау джерибиз махтау бла айтылгъан.
Сууларыбыз – тамам кюмюш белибау,
Къууанчыбыз – эки башлы Минги Тау.

Къарачайым, Малкъарым!
Экибиз да – эки учар къанатым,
Бир миллетден джаратылгъан эки халкъ,
Шох турабыз, бири-бирге болуб джакъ.
Бир миллетден джаратылгъан эки халкъ,
Шох турабыз, бири-бирге болуб джакъ.

Тамаданы сыйлаб, орун бергенле,
Тиширыуну ана къачын кёргенле,
Къартларыбыз – тюз оноулу, келбетли,
Джаш тёлюбюз – тау намыслы, адебли.
Къыйын кюнде шохун-тенгин сатмагъан,
Башхалагъа сауут алыб чабмагъан,
Тюзлюк джолда тенг атлагъан эгизле,
Зорлукъ, ачыу сынамагъыз ёмюрде!

Къарачайым, Малкъарым!
Экибиз да – эки учар къанатым,
Бир миллетден джаратылгъан эки халкъ,
Шох турабыз, бири-бирге болуб джакъ.
Бир миллетден джаратылгъан эки халкъ,
Шох турабыз, бири-бирге болуб джакъ.

[- - - -][- - - -]

[- - - -][- - - -]